Ֆրանչիսկոս Քահանայապետի 17 մարտի պաշտօնական հանդիպումները`

Երկուշաբթի, 17 մարտ, առաւօտեան ժամը 10,30-ին, Ֆրանչիսկոս Սրբազան Հայրը իր գրասենեակի մէջ ընդունեց Քիեւի Աւագ Արքեպիսկոպոս գերերջանիկ Զվիաթոզլաւ Շեվչուքը, որմէ ետք, ժամը 11-ին, ընդունեց գերապայծառ Նիքոլա Ճիրսոլին` առաքելական դեսպան։ Սրբազան Հայրը հուսկ ուկնդրութիւն շնորհեց Թիմօր Էսթի եպիսկոպոսական դասի անդամներուն որոնք հռոմ ժամանած են իրենց հնգամեայ կանոնական այցելութիւնը կատարելու Սուրբ Պետրոսի յաջորդին։
Ան ապա Տոմուս Սանթա Մարթայի մէջ ընդունեց Արժանթինայի նախագահ` Տիկ Քրիստինա Ֆերնանտէզ Տէ Քիրչնէրը։ Յայտնենք որ այս երրորդ անգամն է որ Քահանայապետը ունկնդրութիւն կը շնորհէ Արժանթինի նախագահին։ Անոնց առաջին հանդիպումը տեղի ունեցաւ 18 մարտ 2013-ին, Ֆրանչիսկոս Քահանայապետի գահակալութեան նախօրեակին, իսկ երկրոդ հանդիպումը տեղի ունեցաւ` 28 յուլիս 2013-ին, Երիտասարդութեան համաշխարհային օրուայ եզրափակիչ պատարագի արարողութեան առթիւ, Ռիօ Տէ Ժանէյրօյի մէջ։
''Նախագահ Քիրչների ու անոր ընկերացող շքախումբի Վատիկան այցելութեան նպատակը եղաւ Ֆրանչիսկոս Պապին փոխանցել Արժանթինի ժողովուրդին սէրն ու գնահատանքը, Անոր քահանայապետութեան առաջին տարեդարձին առթիւ'', յայտնեց Սուրբ Աթոռի մամլոյ գրասենեակի տնօրէն Հայր Ֆետերիքօ Լոմպարտին։